बिरगंज ६ साउन ।
पर्सा जिल्लामा लागू औषध कारोबारको गम्भीर प्रकरण राजनीतिक दबाबमा ढाकछोप गर्न खोजिएको रहस्य खुलेको छ। जिल्ला प्रहरी कार्यालय पर्साको अपराध अनुसन्धान शाखा र इलाका प्रहरी कार्यालय पोखरियाबाट खटिएको संयुक्त प्रहरी टोलीले २०८२ साल असार ३१ गते पर्साको पकहामैनपुर गाउँपालिका वडा नम्बर २, सुरजाहा स्थित नेकपा एमालेका सहनी थर भएका एक नेताको घरबाट करिब २ क्विन्टल प्रतिबन्धित लागू औषध गाजा बरामद गरेको थियो ।
तर, सो गम्भीर प्रकृतिको घटनालाई प्रहरीले एक हप्ता नाघ्दा समेत गुपचुप रुपमा दबाएर राखेको छ। गाजालाई जिल्ला प्रहरी कार्यालय ल्याइएन, बरु अहिले पनि इलाका प्रहरी कार्यालय पोखरियामै राखिएको पाइएको छ। एमालेका सांसद तथा नेताहरुको ठाडो दबाबमा सो गाजालाई ‘लावारिस’ देखाएर छुटाउने प्रपञ्च रचिएको आशंका गरिएको छ।
सूत्रका अनुसार, बरामद गाजाको विषयलाई सार्वजनिक नगर्न प्रहरीमाथि आर्थिक चलखेल र बार्गेनिङको दबाब आइरहेको छ। स्थानीय स्रोतको भनाइ अनुसार, हाल राजनीतिक संरक्षणमा रहेका गाजा कारोबारीलाई उम्काउने तयारी तीव्र रूपमा अगाडि बढाइएको छ।
सामान्य चोरी वा सामान्य परिमाणमा लागुऔषध बरामद भएको घटनालाई दुई दिनमै पत्रकार सम्मेलन गरेर सार्वजनिक गर्ने पर्सा प्रहरीले यति ठूलो घटनालाई भने एक सातासम्म पनि सार्वजनिक नगर्नु प्रश्नको घेरामा परेको छ।
स्रोतले दाबी गरे अनुसार, यो घटनालाई न त प्रेस नोटमा उल्लेख गरिएको छ, न त स्थानीय सञ्चारमाध्यमलाई जानकारी दिइएको छ। बरु उल्टै घटनास्थलका स्थानीयलाई डरत्रास देखाएर चुप राखिएको छ।
यसरी प्रहरीको संलग्नता र राजनीतिक हस्तक्षेपबीच गाजाको कारोबार संरक्षण हुँदै जाँदा, पर्सा जिल्ला लागू औषध तस्करीको खुला अखडा बन्ने खतरा झनै बढेको छ।
यस घटनाको निष्पक्ष छानबिन र दोषीमाथि कडा कारबाहीको माग गर्दै नागरिक समाज, सञ्चारकर्मी र सरोकारवाला निकायहरुले आवाज उठाउनुपर्ने बेला आएको छ।